කොණ්ඩමය පිරිමින් පමණක් පලඳින උපත් පාලන ක්‍රමයක්. සමාජ රෝගවලින් ආරක්‍ෂා වීමට මෙන්ම අනාරක්‍ෂිත ගැබ් ගැනීම්වලින් වැළකීමටත් කොණ්ඩමය උපකාර වනවා. ලිංගික කාර්යය අවසාන වනතුරුම කොණ්ඩමය රඳවා තබාගත යුතුයි. කොණ්ඩමය භාවිතයෙන් අතුරු ආබාධ නැත. එසේම කොණ්ඩමයක් භාවිතයෙන් උපරිම ලිංගික තෘප්තිය නොලැබෙන බවට මතයක් පැවැතියත් එය මිථ්‍යාවක් පමණයි.
පෙති වර්ග
උපත් පාලන ක්‍රමයක් ලෙස ගිලින පෙති, භාවිතයට ගන්නා විට චක්‍රානුකූල ක්‍රමයකට ගත යුතුයි. දිනකට පෙත්ත බැගින් ලබාගත යුතු වනවා. ගිලින පෙති භාවිතයට පෙර වෛද්‍ය උපදෙස් ගැනීම ඉතාම වැදගත්. ගිලින පෙතිවල අතුරු විපාක ලෙස ක්ලාන්තය සහ වමනය ඇතිවිය හැකියි. අතුරු ප්‍රතිඵලයක් ලෙස බර වැඩි වනවා. ඉරුවාරදය (මිග්‍රින්) තිබෙන අය මෙම පෙති භාවිතයට පෙර වෛද්‍ය උපදෙස් ලබා ගන්න.
සමට යටින් ඇතුළු කිරීම
සමට යටින් ඇතුළු කරන උපත් පාලන ක්‍රමය, බාහිර රෝගී අංශයෙන් විනාඩි 3ක් ඇතුළත ලබාගන්න පුළුවන්. වසර 05ක කාලයක් වලංගු වනවා. එහි අතුරු විපාක ලෙස අක්‍රමවත් රුධිර වහනය, බර වැඩිවීම සහ සමේ වෙනස්කම් ඇතිවිය හැකියි.
එන්නත්
මාස 3කට වරක් එන්නත ලබාගත යුතුයි. අක්‍රමවත් රුධිර වහනය, බර වැඩිවීම සිදු වනවා. අනෙක් ප්‍රතිකාරවලට වඩා මෙහි අතුරු ප්‍රතිඵල වැඩිවිය හැකියි.
ලුප්
ඊ අකුරක හැඩයෙන් යුතු මෙහි 3, 2 පමණ දිග බාහු 2ක් තිබෙනවා. මෙය යෝනිය හරහා ඇතුළු කරන අතර ඉන්පසුව එය තිබෙන බවක් දැනෙන්නේ නැහැ. වසර 10ක් පමණ වලංගු වන අතර ඒ කාල සීමාව තුළ දරු ප්‍රසූතියක් අවශ්‍ය නම් එය ඉවත් කළ හැකියි.
හදිසි ප්‍රතිකාර
ඉතාම කලාතුරකින් ලිංගිකව එක්වන අය සඳහා සුදුසු වනවා. සාර්ථක ප්‍රතිඵල සඳහා ලිංගික එක්වීමකින් පැය 24ක් තුළ ලබාගත යුතුයි. මසකට දෙවරකට වඩා මෙම පෙති ගැනීමෙන් සාර්ථක ප්‍රතිඵල ලබාගත නොහැකිය. එසේම අපස්මාර රෝගීන්ට සුදුසු නැත.
ප්‍රසව හා නාරි විශේෂඥ වෛද්‍ය නීලත් කේ. රුද්‍රිගු ජේ‍යෂ්ඨ කථිකාචාර්ය කොතලාවල ආරක්‍ෂක විශ්වවිද්‍යාලය